Oranjestad, 5 Januari, 2012 --Aruba Ports Authority durante di su rueda di prensa "Year in Review" a enfatisa cu e puerto di Aruba e cera aña 2011 cu crecemento den tur aspecto di negoshi cu ta wordo hiba ariba su tereno. Esaki ta valido pa e puerto di Barcadera tambe, caminda cu e asina yama "Bulk Cargo" ta drenta.
Masha poco sa tende di e puerto di Barcadera den pueblo, esaki no ta haci'e menos importante. Na e puerto aki Aruba ta ricibi su "Bulk Cargo" of "Commodity Cargo" cu ta e termino cu ta wordo uza pa productonan cu no ta bin den paki y cu ta wordo treci den gran cantidad.
Pa Aruba esaki ta trata principalmente di santo, piedra (Limestone) y cement. E materialnan aki cu ta un tipo di "Dry" cargo esta seco (cu no ta inclui importacion di fuel y gas likido), ta wordo transporta den tankernan y ta wordo descarga via conveyor belt, clamshell of otro tipo di makinaria ariba tera unabes cu e yega su destino.
Durante di aña 2011 Aruba a ricibi 23 bulk-carriers compara cu 19 na 2010. Esakinan a trece un total di 337,000 MT (Metric Tons) di santo, piedra y cement cu a drenta nos isla na 2011, cu si compara esey cu 2010 e ta refleha un crecemento di 44.6%.
