Anthony Maduro y Hubert Semeleer a celebra 50 aña di trabou riba waf

Published on August 19, 2019

Aruba Ports Authority N.V. orguyoso di su empleadonan fiel

Diahuebs ultimo empleadonan di Aruba Ports Authority N.V. (APA) a celebra añanan di servicio di Sr. Anthony Maduro y Sr. Hubert Semeleer. Ta trata aki di dos empleado loyal y ehemplar na APA, semper cla pa coopera unda cu por. Sr. Anthony Maduro a cumpli 20 aña di servicio y ta ocupa e funcion di “Onder Opzichter 1ste klasse”. Sr. Hubert Semeleer a cumpli 30 aña di servicio y ta ocupa e funcion di “Senior Loods”.

Aruba Ports Authority N.V. a organisa un atardi di celebracion na The West Deck, unda coleganan tawata tin oportunidad pa felicita e hubilarionan den presencia di nan famia y pasa un rato ameno. Gerencia ta masha agradecido pa tur nan aña di servicio y a expresa esaki tambe den un discurso, unda cu a duna Sr. Maduro y Sr. Semeleer e aprecio y e elogio mereci pa nan dedicacion y aporte na APA.

“Boso ta ehempel di loke nos ta spera di nos empleadonan y pa APA semper ta un honor reconoce logronan asina. Boso contribution na e bienestar di e compania y na Aruba ta altamente aprecia”, asina Marc Figaroa, Director di Aruba Ports Authority N.V. a bisa durante e celebracion.